A oitava edición do Correlingua remata esta semana cuns rexistros de participación que van superar os 40.000 rapaces que prevía a organización. Cada ano, é maior o número de vilas que acollen as carreiras, "nesta edición contamos con Ribeira, Monforte e Verín, que nunca antes participaran", apunta Francisco Rei, responsábel de Zonas da Mesa pola Normalización Lingüística. "Que as carreiras se desenvolvan en máis lugares significa que o Correlingua se está a consolidar e que vai para adiante", engade. Ao aumento das vilas súmaselle o incremento do número de centros privados e concertados.
As carreiras, que se organizan en función das idades dos participantes, dispútanas os nenos de Educación Infantil, de Primaria e de Secundaria. Rei sinala que malia haber corredores moi cativos, "a participación é consciente e voluntaria". O responsábel nacional da Mocidade pola Normalización subliña o compromiso dos nenos que proceden de zonas galegofalantes, "senten a carreira como un revulsivo e como un reforzo para a lingua que falan e iso é importante para que vexan o galego como calquera outra lingua".
As actividades previas non son menos importantes que as carreiras que dinamizan o idioma. A escritura do manifesto, o deseño das pancartas que fomentan o emprego da lingua e máis a banda deseñada forman parte das tarefas coas que os escolares amosan que se pode vivir os 365 días do ano falando galego. No seu oitavo ano consecutivo, o Correlingua celébrase baixo o lema "En galego, cabe todo", en alusión ás memorias dos MP3 e dos I-pods, onde hai espazo para todo o que se faga en galego. Deste xeito, a organización transmítelles aos estudantes que a lingua pode estar presente en todas as actividades da vida cotiá.
Esta edición incorpora unha novidade, A polo ghit do Correlingua, no que participaron 51 grupos musicais. A banda Sínefres, de Boiro, resultou a elixida pola meirande parte do alumnado. "Nas vilas nas que actuou tivo unha acollida incríbel", asegura Rei. A presenza musical no Correlingua complétase coas actuacións do Xabarín Club e vai acompañada polos espectáculos teatrais do grupo Chévere, entre outros. O segundo número da revista Correlingua e un documental da TVG sobre as carreiras pechan as actividades que forman parte do Correlingua.
Quen organiza o Correlingua?
A Mesa pola Normalización Lingüística, que ten convocada unha manifestación a prol da lingua este domingo, 18 de maio, CIG-Ensino, a Asociación Socio-Pedagóxica Galega e os Concellos de Lugo, Pontevedra, Santiago e Vigo, coa colaboración de Vicepresidencia, Cultura, Innovación e Industria, Política Lingüística e a CRTVG, artellan as diferentes carreiras a prol da lingua. Co Correlingua a organización convida os estudantes a reivindicar o seu dereito a crecer en galego.
Día 18, manifestación a prol do galego
A oitava edición do Correlingua finaliza a semana na que se celebra a manifestación "Polo dereito a vivirmos en galego". A Mesa anima os rapaces e a toda a sociedade a participar na manifestación do vindeiro domingo en Santiago. A cita é ás 12 da mañá do día 18 na Alameda de Compostela. A Mesa pon a disposición dos que queiran asistir autobuses de balde dende distintos puntos de Galiza.
